ഷംസീറിനൊപ്പം, വടിവാളിനെതിരെ: അഡ്വ: ജയശങ്കർ

സി പി എം എം തലശ്ശേരി എൽ എ, എ.എൻ ഷംസീറിനെ ട്രോളി കൊന്ന് പ്രശസ്ത രാഷ്ട്രീയ നിരൂപകൻ അഡ്വ: ജയശങ്കർ. ഇത്തരം ട്രോള് ശത്രുക്കൾക്കെതിരെ പോലും കാണാനാഗ്രഹിക്കുന്നില്ലെന്നു സാമൂഹിക മാധ്യമ ലോകം.  ഷംസീർ ഒരു പച്ച പ്പാവമാണെന്നും, ഗൗതമ ബുദ്ധൻ്റെയും മഹാത്മാ ഗാന്ധിയുടെയും അത്യുത്തമ ശിഷ്യന്മാരാണ് കണ്ണൂർ ജില്ലയിലെ മാർക്സിസ്റ്റ് നേതാക്ക ളെന്നും വരെ കടന്നു പറയുന്ന ജയശങ്കർ കുറിപ്പ് അവസാനിപ്പിക്കുന്നത് "ഷംസീറിനൊപ്പം, വടിവാളിനെതിരെ" എന്നാണ്. സി ഓ ടി നാസിറിനെതിരെ ഉള്ള ആക്രമണത്തിൽ എം എൻ കാരശ്ശേരി, ഉമേഷ് ചള്ളിയിൽ തുടങ്ങിയവർ നിശിതമായാണ് ഷംസീറിനെ വിമർശിച്ചത്.

വായിച്ചു കണ്ണ് തള്ളി പോകുന്ന ജയശങ്കറിന്റെ ട്രോൾ തുടർന്ന് വായിക്കുക:

സഖാവ് ഷംസീറിനെ അപകീർത്തിപ്പെടുത്താനുളള ശ്രമം അപലപനീയം. വിപ്ലവ യുവജന നായകനും തലശേരി എമ്മല്ലെയുമായ സഖാവ് എഎൻ ഷംസീറിനെ കരിവാരിത്തേക്കാൻ ചില തല്പര കക്ഷികളും പിന്തിരിപ്പൻ ബൂർഷ്വാ മാധ്യമങ്ങളും ചേർന്ന് നടത്തുന്ന കുത്സിത ശ്രമം വിലപ്പോവില്ല.

ഗൗതമ ബുദ്ധൻ്റെയും മഹാത്മാ ഗാന്ധിയുടെയും അത്യുത്തമ ശിഷ്യന്മാരാണ് കണ്ണൂർ ജില്ലയിലെ മാർക്സിസ്റ്റ് നേതാക്കൾ. പ്രത്യേകിച്ച് പി വിജയൻ, പി ശശി, പി ജയരാജൻ മുതലായവർ. അതേ വിഭാഗത്തിലെ ഇളമുറക്കാരനാണ് സഖാവ് ഷംസീർ. മനസാ വാചാ ഒരക്രമവും ചെയ്യില്ല; ആരെയും അക്രമത്തിന് പ്രേരിപ്പിക്കില്ല. കൊലപാതകം എന്നു കേൾക്കുന്നതേ പേടിയാണ്. പരമ സാത്വികൻ.

കരുണാമയനും ദീനദയാലുവുമായ ഷംസീർ സഖാവ്, പാർട്ടി വിട്ടു റിബലായി മത്സരിച്ച ഒരു കുലംകുത്തിയെ വെട്ടാൻ ഗുണ്ടകളെ അയച്ചു എന്നു പറഞ്ഞാൽ ഒരാളും ഒരിക്കലും വിശ്വസിക്കില്ല. ഇതേക്കുറിച്ച് പാർട്ടി നിയോഗിച്ച രണ്ടംഗ കമ്മീഷൻ അന്വേഷണം നടത്തുന്നുണ്ട്. അതിൽ ഷംസീറിൻ്റെ നിരപരാധിത്വം തെളിയും. അതോടെ ദുരാരോപണങ്ങളുടെ മുനയൊടിയും.

ഇടതുപക്ഷ പ്രസ്ഥാനത്തെ അപകീർത്തിപ്പെടുത്താനുളള സാമ്രാജ്യത്വ ഫാസിസ്റ്റ് അജണ്ടക്കെതിരെ സാംസ്കാരിക നായകരുടെ പ്രസ്താവന നാളെ പുറത്തുവരും.

#ഷംസീറിനൊപ്പം, വടിവാളിനെതിരെ